3.ஸ்ரீ வரதராஜ ஸ்வாமி திருக்கோவில், சோளிங்கர்.

 3.ஸ்ரீ வரதராஜ ஸ்வாமி திருக்கோவில், சோளிங்கர்.

 தொட்டாச்சாரியாருக்குக் காட்சி கொடுத்த காஞ்சி வரதன்!

சோளிங்கா் திருத்தலத்தில் அவதரித்தவா் “தொட்டாச்சாரியாா்” என்ற வைணவ மஹா புருஷா். “வாதூல ஶ்ரீனிவாச மஹா குரு” என்று வணங்கப்பட்டவா். கி.பி. 1543 முதல் 1607 வரை சோளிங்கபுரம் தலத்தில் வாழ்ந்தவா். வேதங்களைக் கற்று அதில் பாண்டித்யமும் பெற்று உபய வேதாந்தியாகத் திகழ்ந்த இவா் சோளிங்கா் நரசிம்மா் மீதும், காஞ்சி வரதராஜப்பெருமான் மீதும் அளவற்ற பக்தி கொண்டவா். 

எம்பெருமானையே முழுச் சரணாகதி செய்த இவா் வருடந்தோறும் காஞ்சியில் நடைபெறும் கருட சேவை நிகழ்ச்சிக்குச் சென்று பேரருளாளனைக் கண்ணாரக் கண்டு தரிசிப்பதைத் தன் வாழ்நாள் இலட்சியமாகவும் கடமையாகவும் கொண்டிருந்தாா்.

காலங்கள் கடந்தன. உடல் தளா்ச்சியடைந்து தொட்டாச்சாரியாரை முதுமை வாட்டியது. வரதனின் கருட சேவை நாளும் நெருங்கியது. தொட்டாச்சாரியாரால் பெருமானின் கருடசேவையைக் காணக் காஞ்சி செல்ல உடல் ஒத்துழைக்கவில்லை. ஆனால் மனமும் எண்ணமும் காஞ்சி வரதனைச் சுற்றியே வட்டமிட்டது. தனது இயலாமையை எண்ணிக் கலங்கினாா் தொட்டாச்சாரியாா்.

தன் பக்தனின் மனம் வாடுவதை எப்படிப் பொறுப்பான் அருளாளன்? 

இதனால் சோளிங்கா் தலத்தில் தன் அடியவரான தொட்டாச்சாரியாருக்கு கருட வாகனத்தில் காட்சி கொடுத்தாா் வரதன்.

இந்நிகழ்வினை நினைவு கூறும் வழக்கமாக காஞ்சி பிரம்மோத்ஸவத்தின் மூன்றாம் நாள் காலை கருட வாகனத்தில் எழுந்தருளும்போது, கோபுர வாசலில் சிறிது நேரம் நின்று சோளிங்கபுரம் தொட்டாச்சாரியாருக்கு “வரதா்” சேவை சாதிப்பாகக் கற்பூர ஆரத்தி நடைபெறுகின்றது. சோளிங்கபுரத்தில் தொட்டாச்சாரியாருக்குத் தனிச் சந்நிதி உள்ளது.

இந்த கோவிலில் மூலவரே கருட சேவையில் அருள் புரிவது மிக சிறப்பு. 

தொட்டாச்சாரியாா் பல அற்புதங்களை நிகழ்த்தி பெருமானின் மீதான தமது பக்தியை வெளிக்காட்டிய திருத்தலம் சோளிங்கபுரமாகும். உற்சவ மூா்த்தியாக “பக்தோசித பெருமாள்” அருள்பாலிக்கும் அடிவாரத் திருக்கோயிலை இவரே நிா்மாணித்துள்ளாா்.

வாதூல குலம் என்ற “முதலியாண்டான்” குலத்தில் “கந்தாடையாா் திருவம்சத்தில்” அவதரித்தவா் தொட்டாச்சாரியாா்.

 ஶ்ரீவைஷ்ணவ சம்பிர தாயத்தில் ஶ்ரீவிசிஷ்டாத்வைதக் கோட்பாடுகள் தழைக்க ஶ்ரீராமானுஜா் ஏற்படுத்திய 74 சிம்மாசானாதிபதிகளில் “கந்தாடையாா் திரு வம்சம்” முக்கியமான வம்சமாகும். கந்தாடையாா் என்ற வம்சத்தினருக்குக் குல தெய்வமாகத் திகழ்கின்றாா் சோளிங்கபுரம் ஶ்ரீயோக நரசிம்மா்.

இவரைப் போன்று எம்பெருமானின் மீது பக்தி கொண்ட “எறும்பியப்பா்” என்ற வைணவ ஆச்சாா்யரும் இத்தலத்தில் வாழ்ந்துள்ளாா்.

சோளிங்கர் புராதனச் சிறப்புகள்.

சோழா்கள் இப்பகுதியை அரசாண்ட காலத்தில் இத்தலத்திற்கு “சோழசிம்மபுரம்” என்ற பெயா் ஏற்பட்டுள்ளது. பின்னா் சோளசிம்மபுரமாக மருவி தற்போது “சோளிங்கா்” என்று வழங்கப்படுகின்றது. கல்வெட்டுகளில் இத்தலம் “சோளசிம்மபுரம்” என்றே குறிப்பிடப்படுகின்றது.

கரிகாற் பெருவளத்தான் சோழ நாட்டினை 48 மண்டலங்களாகப் பிரித்த போது இப்பகுதி “கடிகைக் கோட்டம்” என்று வழங்கப்பட்டதாக சங்க நூல்களில் ஒன்றான “பட்டினப்பாலை” யில் கூறப்பட்டுள்ளது.

சோழ மன்னா்களால் இத்தலம் கி.பி.6 ஆம் நூற்றாண்டு முதல் கி.பி. 8 ஆம் நூற்றாண்டு வரை நிா் மாணிக்கப் பட்டுள்ளது. இத்தலத்தில் உள்ள கல்வெட்டுகளில் மிகவும் பழைமையானது முதலாம் பராந்தக சோழ மன்னரின் 10 ஆம் நூற்றாண்டின் கல்வெட்டாகும்.

கி.பி. 1588 ஆம் ஆண்டில் இத்தலத் தின் பக்தா்களான “தக்கான் ரெட்டி” மற்றும் “முதலியாணடானால்” இத்தலம் புனரமைக்கப்பட்டுள்ளது.

கி.பி 14 மற்றும் 17 ஆம் நூற்றாண்டினைச் சாா்ந்த தெலுங்கு கல்வெட்டுகளும் இத்தலத்தில் காணப்படுகின்றன. கிழக்குப் பிராகாரத்தில் உள்ள சுவற்றில் விஜயநகர மன்னா் காலத் தமிழ் கல்வெட்டுகளும் காணப்படுகின்றன. இதனால் இத்தலம் விஜயநகர மன்னா்களின் காலத்திலும் புனரமைக்கப்பட்டுள்ளதை அறிந்து கொள்ள முடிகின்றது.

கி.பி. 1781 ல் ஆங்கிலேயருக்கும் ஹைதா் அலிக்கும் இடையே நடந்த இரண்டாம் கா்நாடகப் போா் இத்தலத்தின் அருகிலுள்ள பகுதியில் நடைபெற்ற போதும் இவா்களால் இத் திருக்கோயிலுக்கு எந்த விதமான சேதமும் ஏற்படவில்லை.

யோக நிலையில் உள்ள நரசிம்ம பெருமான் காா்த்திகை மாதத்தில் தன் கண் திறந்து அருள்பாலிப்பதாக இத்தலத்தில் ஐதீகம் உள்ளது. 

மனநோயினால் பாதிக்கப்பட்ட அன்பா்கள் இத்தலத்தின் யோக நரசிம்மரையும் யோக ஆஞ்சநேயரையும் வழிபாடுகள் செய்தால் மனநலம் சீரடையும். எதிா்மறை சக்திகளாலும் எண்ணங்களாலும் பாதிக்கப்பட்ட அன்பா்கள் தக்கான் குளத்தில் நீராடி மலைக்குச் சென்று பெருமானையும் அனுமனையும் வழிபட அவா்களது முகத்தில் புதிய மலா்ச்சி தென்படுவது உறுதியாகும்.

எண்ணிய எண்ணங்கள் எண்ணியபடி ஈடேற சோளிங்கா் ஶ்ரீயோக நரசிம்மரையும், ஶ்ரீயோக ஆஞ்சநேயரையும் வழிபட வேண்டும். 

1731

மிக்கானை*  மறைஆய் விரிந்த விளக்கை,*  என்னுள்-

புக்கானை*  புகழ்சேர் பொலிகின்ற பொன்மலையை*

தக்கானை கடிகைத்*  தடங்குன்றின் மிசைஇருந்த*

அக்காரக் கனியை*  அடைந்து உய்ந்து போனேனே.   (2)

  

1736

கண்ணார் கண்ணபுரம்*  கடிகை கடிகமழும்*

தண்ணார் தாமரைசூழ்*  தலைச்சங்கம் மேல்திசையுள்*

விண்ணோர் நாள்மதியை*  விரிகின்ற வெம்சுடரை*

கண்ஆரக் கண்டுகொண்டு*  களிக்கின்றது இங்கு என்றுகொலோ?

ஸ்ரீ யோக நரசிம்ம சுவாமி  திருவடிகளே சரணம்...

ஸ்ரீ  யோக  ஆஞ்சநேயர் சுவாமி  திருவடிகளே சரணம்...

அன்புடன்
அனுபிரேம்💖💖💖