அனுவின் தமிழ் துளிகள்: பூதத்தாழ்வார்

21 October 2026

பூதத்தாழ்வார் - ஐப்பசியில் அவிட்டம்

ஸ்ரீ பூதத்தாழ்வாரின் அவதார திருநட்சத்திரம் இன்று .... ஐப்பசி மாதம் அவிட்ட நட்சத்திரத்தில் அவதரித்தவர் இவர்.

பூதத்தாழ்வார் வாழி திருநாமம்!

அன்பே தகளி நூறும் அருளினான் வாழியே

ஐப்பசியில் அவிட்டத்தில் அவதரித்தான் வாழியே

நன்புகழ் சேர் குருக்கத்தி நாண்மலரோன் வாழியே

நல்ல திருக்கடல்மல்லை நாதனார் வாழியே

இன்புருகு சிந்தை திரியிட்ட பிரான் வாழியே

எழில் ஞானச் சுடர்விளக்கை ஏற்றினான் வாழியே

பொன்புரையும் திருவரங்கர் புகழுரைப்போன் வாழியே

பூதத்தார் தாளிணை இப் பூதலத்தில் வாழியே !

பூதத்தாழ்வார் -

பிறந்த ஊர் - மகாபலிபுரம்

பிறந்த ஆண்டு - 7ம் நூற்றாண்டு

நட்சத்திரம் - ஐப்பசி அவிட்டம் (வளர்பிறை நவமி திதி)

கிழமை - புதன்

எழுதிய நூல் - இரண்டாம் திருவந்தாதி

பாடல்கள் - 100

சிறப்பு - குருக்கத்தி மலரில் பிறந்தவர், திருமாலின் கதாயுத அம்சம்.

மஹாவிஷ்ணுவின் கதையான கெளமோதகியின் அம்சமான பூதத்தார் கடல்மல்லையில் (மாமல்லபுரம்), கடலுக்கருகில் உள்ள குளக் கரைத் தோட்டத்தில் ஒரு குருக்கத்தி (நீலோத்பவ) மலரில் அவதரித்தார்.

இவர் திருமாலையே எந்நேரமும் நினைத்து, அவர் கல்யாண குணங்களை அனுபவித்துக் கொண்டே-வேறு எதிலும் நாட்டமில்லாமல் , ஒரு அசாதாரண மனிதராக இருந்ததால், பூதத்தாழ்வார் என்றழைக்கப்பட்டார்.

வடமொழியில் பூ என்பது ஓர் அடிச் சொல். அதன் அடியாகப் பிறந்ததே பூதம் என்னும் சொல். இதற்குச் சத்து (அறிவு) என்று பொருள்.

எம் பெருமானின் திருக்குணங்களை அனுபவித்தே சத்தைப் பெற்றார் ஆதலால், பூதத்தாழ்வார் எனப்பட்டார் எனவும், பூதம் என்பது இவ்வுலகிலே நிலைத்து இருக்கக் கூடிய பொருள்களைக் குறிப்பது.

அதாவது பகவத் பக்தி, பகவத் ஞானம், பரம பக்தி என எம்பெருமானை தவிர வேறு ஒன்றும் இல்லை எனும் வைராக்கியம். அவ்வாறு எம்பெருமானிடத்திலே, அவனது கல்யாண குணங்களில் அடிமை செய்யப் பெற்றவராதலால் பூதத்தாழ்வார் எனப்பட்டார் எனவும் பெரியவர்கள் வாக்கு.

இவரின் மறு பெயர்கள் பூதஹ்வயர் மற்றும் மல்லாபுரவராதீசர் ஆகியவை.

இவர் அருளிச்செய்த பிரபந்தம் இரண்டாம் திருவந்தாதி. நூறு பாசுரங்கள் அந்தாதி க்ரமத்திலே இருக்கக்கூடிய பாசுரங்கள்.

பூதத்தாழ்வார் வாழி திருநாமத்தின் விளக்கம்

அன்பே தகளியா ஆர்வமே நெய்யாக என்று தொடங்கி பூதத்தாழ்வார் அருளிச்செய்த நூறு பாசுரங்கள் கொண்டது இரண்டாம் திருவந்தாதி. அப்படிப்பட்ட பூதத்தாழ்வார் பல்லாண்டு காலம் வாழ வேண்டும்.

ஐப்பசியில் அவிட்ட நக்ஷத்திரத்தில் அவதரித்தவர் பூதத்தாழ்வார் அவர் வாழ்க என்று சொல்கிறார் அப்பிள்ளை.

குருக்கத்தி என்பது மாதவிக் கொடி என்று அழைக்கப்படும் ஒரு கொடி. நல்ல புகழை உடையதான அந்தக் கொடியிலே ஒரு புஷ்பத்திலே அவதரித்தவர் பூதத்தாழ்வார். இவரும் புஷ்பத்திலிருந்து அவதரித்ததால் அயோநிஜராவார். அப்படிப்பட்ட பூதத்தாழ்வார் வாழ்க,

திருக்கடல்மல்லை என்ற நகரத்துக்குத் தலைவராக இருக்கக் கூடியவர் இவர் வாழ்க. திருக்கடல்மல்லை தேசத்தில் எம்பெருமானுடைய அடியவர்கள் பலரையும் வழி நடத்தியவர் என்று பூதத்தாழ்வார் அறியப்படுகிறார்.

தன்னுடைய அன்பையே திரியாக இட்டு விளக்கேற்றிய பூதத்தாழ்வார் வாழ்க.

தனக்கு பகவத் விஷயத்திலே இருக்கக்கூடிய ஞானத்தையே கொண்டு விளக்கை ஏற்றிய பூதத்தாழ்வார் வாழ்க.

பொன்னைப் போன்று இருக்கக்கூடிய திருவரங்கத்தில் பள்ளி கொண்டுள்ள ஸ்ரீ ரங்கநாதர். அவரிடத்தலே மிகவும் ஈடுபாடு கொண்டு அவருடைய புகழை தன்னுடைய பாசுரங்களில் அழகாக வெளியிட்டவர் பூதத்தாழ்வார். அப்படிப்பட்ட பூதத்தாழ்வார் வாழியே

இந்த பூமியிலே பூதத்தாழ்வாருடைய இரண்டு திருவடிகளும் பல காலம் வாழவேண்டும் என்று அப்பிள்ளை அருளிச் செய்துள்ளார்.

ஸ்ரீ பூதத்தாழ்வார் அருளிச்செய்த இரண்டாம் திருவந்தாதி

2247

இது கண்டாய், நல் நெஞ்சே! இப் பிறவி ஆவது,

இது கண்டாய் எல்லாம் நாம் உற்றது, – இது கண்டாய்

நாரணன் பேர் ஓதி நகரத்து அருகு அணையா,

காரணமும், வல்லையேல் காண். 66

2248

கண்டேன் திருமேனி யான் கனவில், ஆங்கு அவன் கைக்

கண்டேன் கனலும் சுடர் ஆழி, – கண்டேன்

உறு நோய் வினை இரண்டும் ஓட்டு வித்து, பின்னும்

மறு நோய் செறுவான் வலி. 67

2249

வலி மிக்க வாள் எயிற்று வாள் அவுணர் மாள

வலி மிக்க வாள் வரை மத்து ஆக, வலி மிக்க

வாள் நாகம் சுற்றி, மறுகக் கடல் கடைந்தான்,

கோள் நாகம் கொம்பு ஒசித்த கோ .68

2250

கோ ஆகி மா நிலம் காத்து, நம் கண் முகப்பே

மா ஏகிச் செல்கின்ற மன்னவரும் – பூ மேவும்

செங் கமல நாபியான் சேவடிக்கே, ஏழ் பிறப்பும்,

தண் கமலம் ஏய்ந்தார் தமர். 69

2251

தமர் உள்ளம் தஞ்சை, தலை அரங்கம் தண் கால்,

தமர் உள்ளும் தண் பொருப்பு, வேலை, – தமர் உள்ளும்

மாமல்லை, கோவல், மதிள் குடந்தை என்பரே,

ஏ வல்ல எந்தைக்கு இடம். 70

உபதேசரத்தினமாலை

6
ஐப்பசியில் ஓணம் அவிட்டம் சதயம் இவை
ஒப்பிலவா நாள்கள் உலகத்தீர் – எப்புவியும்
பேசுபுகழ் பொய்கையார் பூதத்தார் பேயாழ்வார்
தேசுடனே தோன்று பிறப்பால்

7
மற்றுள்ள ஆழ்வார்களுக்கு முன்னே வந்துதித்து
நற்றமிழால் நூல்செய்து நாட்டை உய்த்த - பெற்றிமையோர்
என்று முதலாழ்வார்களென்னும் பெயரிவர்க்கு
நின்றது உலகத்தே நிகழ்ந்து