சுந்தரராஜப் பெருமாள் திருக்கோவில் , அழகிய மணவாளம்.

 ஸ்ரீ சுந்தரராஜப் பெருமாள் திருக்கோவில் , அழகிய மணவாளம், மண்ணச்சநல்லூர், திருச்சி .

திருச்சியிலிருந்து 15 கி.மீ  தொலைவில் , மண்ணச்சநல்லூர் என்னும் ஊரில்,  அழகிய மணவாளம்  என்ற கிராமத்தில்  இக்கோவில் அமைந்துள்ளது .

பசுமையான வயல் வெளிகளுக்கு நடுவே இப்பெருமாள் கோவில் கொண்டுள்ளார்.

இக்கோவில் மிக பழைமையானதும் , சிறப்பு வாய்ந்ததும்  என்பதை பின்வரும் செய்திகள் மூலம் அறியலாம் ..

அந்தச் சம்பவம்...

1321-ம் ஆண்டு டில்லியை ஆட்சி செய்த இஸ்லாமிய மன்னர் கியாசுதீன் துக்ளக் என்பவரின் மகன் உலூக்கான் யுவராஜாவாக பட்டம் சூட்டிக்கொண்டான். அதை ஒட்டி தென்னிந்தியாவின் மீது படையெடுக்க ஆயத்தம் செய்தான். இவனே பின்னர் மன்னரானதும் முகமதுபின் துக்ளக் என்ற பெயரோடு ஆட்சி செய்தான்.

1323 ஆம் ஆண்டு உலூக்கான் பெரும் படையோடு தமிழகத்தை நோக்கி வருகிறான் என்ற செய்தி கேள்விப்பட்டதும், அனைவரும் பதற்றம் அடைந்தனர் . புராதனமான ஆலயங்களைப் பாதுகாக்க வேண்டுமே என்ற உயர்ந்த எண்ணம்தான் அவர்களின் பதற்றத்துக்குக் காரணம்.


அப்படித்தான் உலூக்கான் படையெடுத்து வருவதைக் கேள்விப்பட்டதுமே திருவரங்கத்தைச் சேர்ந்தவர்கள் திடுக்கிட்டனர். எங்கே கோயில் சொத்துக்கள் கொள்ளை போய்விடுமோ, தெய்வ திருமேனிகள்  பின்னப்படுமோ என்றெல்லாம் அஞ்சியவர்கள் ஒரு முடிவுக்கு வந்தார்கள்.

அப்போது பிள்ளை லோகாச்சாரியார் என்ற வைணவ அடியார் , திருவரங்கம் கோவிலின் மூலவர் ரங்கநாதப் பெருமாளையும், தாயார் ரங்கநாயகியையும் மறைத்துச் சுவர் எழுப்பினார்.


பின்னர் சிலரை துணைக்கு அழைத்துக்கொண்டு, உற்சவ மூர்த்தியான அழகிய மணவாள நாதனை பாதுகாக்க வேண்டி, சுமந்து கொண்டு ஊர் ஊராக பயணம் சென்றார்.

 எங்கே ஒரே இடத்தில் தங்கினால் பெருமாள் இருக்கும் இடம் எதிரிகளுக்கு தெரிந்து விடுமோ என்று பயந்து  அழகர் கோயில், முந்திரி மலை பள்ளத்தாக்கு,  கோழிக்கோடு,  திருக்கணாம்பி, திருநாராயணபுரம்,  திருப்பதி,  செஞ்சி,  அழகியமணவாள கிராமம் என பல இடங்களில் பெருமானை மறைத்து வைத்து பாதுகாத்தார்.


எல்லா இடங்களிலும் தன்னால் இயன்ற பூஜைகளை செய்து வழிபட்டார். 118 வயதில் பிள்ளை லோகாச்சாரியார்  பெருமாளை காக்கும் முயற்சியில் மதுரை கொடிக்குளம் அருகே எதிரிகள் முற்றுகையிட்ட போது மலைக்குகை உச்சியை அடைந்த பெரியவர், தவறி விழுந்து படுகாயம் அடைந்தார். பின்னர் மறைந்தும் போனார்.

அவரது சீடர்களால் ஸ்ரீரங்கம் உற்சவ மூர்த்தியான அழகிய மணவாள நாதப் பெருமாள் கவனமாக பாதுகாக்கப்பட்டு , பின்னர்  48 ஆண்டுகள் கழித்து இனி எதிரிகள் தொல்லை இல்லை என்ற நிலையில்  மீண்டும் திருவரங்கம் வந்தார் நம் பெருமாள்.

( மிக பெரிய சரித்திரம் இது ..இன்னும் அறிந்துக் கொள்ள வேண்டிய செய்திகள் பல உள்ளன.)  நம் பெருமாள் சில காலம் தங்கிய இடம் இந்த அழகிய மணவாளம் கோவில் .

 இங்கு யோக நரசிம்மர் சன்னதி  மற்றும் விஷ்வக்க்ஷேனர் சன்னதிகள் தனித்தனியாக அமைந்துள்ளன.

கோபுர தரிசனம் 

 இங்கிருக்கும் மூலவர் மிக உயர்ந்த திருமேனி.அவரின் திருநாமம்  சுந்தரராஜப் பெருமாள்  நின்ற கோலத்தில் ஸ்ரீதேவி மற்றும் பூதேவியுடன் தரிசனம் தருகிறார்.

இணையத்திலிருந்து

 மூலவரை எப்பொழுதும் நாங்கள்  படம் எடுப்பது இல்லை , அதனால் இணையத்திலிருந்து கிடைத்த அழகிய படங்களை   பகிர்கிறேன் .

இணையத்திலிருந்து

வம்பவிழும்துழாய்மாலைதோள்மேல் 

கையன ஆழியும்சங்கும்ஏந்தி *

நம்பர்நம்இல்லம்புகுந்துநின்றார் 

நாகரிகர்பெரிதும்இளையர் *

செம்பவளம்இவர்வாயின்வண்ணம் 

தேவரிவரதுஉருவம்சொல்லில் *

அம்பவளத்திரளேயும்ஒப்பர் 

அச்சோஒருவரழகியவா!

4 1761

கோழியும்கூடலும்கோயில்கொண்ட 

கோவலரேஒப்பர், குன்றமன்ன *

பாழியந்தோளும் ஓர்நான்குடையர் 

பண்டு இவர்தம்மையும்கண்டறியோம் *

வாழியரோஇவர்வண்ணம்எண்ணில் 

மாகடல்போன்றுளர், கையில்வெய்ய *

ஆழியொன்றேந்திஓர்சங்குபற்றி 

அச்சோஒருவரழகியவா! 

5 1762

வெஞ்சினவேழம்மருப்பொசித்த 

வேந்தர்கொல்? ஏந்திழையார்மனத்தை *

தஞ்சுடையாளர்கொல்? யான்அறியேன் 

தாமரைக்கண்கள்இருந்தவாறு *

கஞ்சனையஞ்சமுன்கால்விசைத்த 

காளையாரவர், கண்டார்வணங்கும் *

அஞ்சனமாமலையேயும்ஒப்பர் 

அச்சோஒருவரழகியவா! 

6 1763

பிணியவிழ்தாமரைமொட்டலர்த்தும் 

பேரருளாளர்கொல்? யான்அறியேன் *

பணியும்என்நெஞ்சமிதென்கொல்? தோழீ! 

பண்டுஇவர்தம்மையும்கண்டறியோம் *

அணிகெழுதாமரையன்னகண்ணும் *

அங்கையும்பங்கயம், மேனிவானத்து *

அணிகெழுமாமுகிலேயும்ஒப்பர் 

அச்சோஒருவரழகியவா! 

7 1764

மிக பொறுமையாக தரிசனம் செய்யலாம் , மிக அமைதியான  கோவில், வயல்வெளியும் , தென்னை மரங்களும் சூழ உள்ள இடம் .

இங்கு செல்ல பேருந்து வசதி எப்படி என்று தெரியவில்லை . சொந்த வாகனத்தில் செல்லும் போது மிக எளிதாகவே இங்கு செல்லலாம் .


ஓம் நமோ நாராயணா..

அன்புடன்

அனுபிரேம்