மூன்று வகை களி...

வாழ்க வளமுடன் 

உடலை வலுவூட்டக் கூடிய 3 வகை களி...

1. ராகி களி(  கேப்பைக் களி, கேழ்வரகுக் களி )

 தேவையானவை
ராகி மாவு - 1 கப்
தண்ணீர் - 3 கப்
உப்பு

செய்முறை -

ஒரு பாத்திரத்தில் இருமடங்கு நீரை ஊற்றி நன்றாக கொதிக்க விட வேண்டும். ராகி மாவை, மீதம் உள்ள நீரில் கரைத்து பின்  கொதி நீரில் சேர்த்து , கொஞ்சம் உப்பும் போட்டு  நன்றாகக் கிளற வேண்டும். இது கொஞ்சம் இளகளாக இருக்கும் .

இன்னும் கெட்டியாக வேண்டும் என்றால் 2 .5 மடங்கு நீர் போதும் ..

     

இங்கு கர்நாடகாவில் நன்கு கெட்டியாக அரிசி சேர்த்து  செய்து... பின் அதை கெட்டியாக  உருட்டி வைத்து குழம்பு சேர்த்து உண்பார்கள். அதன் பெயர் ராகி மொத்தே .

எங்கள் வீட்டில் இளகளாக செய்து குழம்பு மற்றும்  வெல்லம்  சேர்த்து சாப்பிடுவோம் .



2. உளுத்தங்களி  -

 தேவையானவை

 தோல் உளுத்தம் பருப்பு  - 1/2 கப்
அரிசி - 3 ஸ்பூன்

 வெல்லம் - 1/4 கப்
தேங்காய் துருவியது
நல்லெண்ணெய்

செய்முறை -

அரிசி , உளுத்தம் பருப்பை  தனித்தனியாக வறுக்க வேண்டும் . பின் மிக்ஸ்யில் சேர்த்து பொடிக்கவும் .


ஒரு பாத்திரத்தில் தண்ணீர் ஊற்றி வெல்லம்  சேர்த்து   கலக்கி  கொதிக்க வைக்கவும்  .பின்னர் அதனுடன் பொடித்த  மாவை சேர்த்து நன்கு கிளற வேண்டும் ...

தேங்காய் துருவல் ,  நல்லெண்ணெய் அல்லது நெய்  ஆகியவற்றை சேர்த்து நன்கு சுருண்டு வரும் வரை கிளற வேண்டும்.

உளுத்தங்களி தயார் ...அதை உருண்டையாக உருட்டி வைத்து சாப்பிடலாம் ...

3. வெந்தயக்களி -

தேவையானவை :

புழுங்கல் அரிசி - 1 கப்
உளுந்தம் பருப்பு - 1/4 கப்
வெந்தயம் - 1/8 கப்
நல்லெண்ணெய்
வெல்லம்

செய்முறை  -

புழுங்கல் அரிசி, வெந்தயம்  மற்றும் உளுந்தம் பருப்பை தனி தனியாக ஊற வைக்கவும் . முதலில் வெந்தயத்தை நன்கு மைய அரைக்கவும் , பின் உளுந்து சேர்ந்து மசித்த பின் அரிசி சேர்த்து அரைக்க வேண்டும் .


முதலில் தண்ணீர் கொதிக்க வைத்து பின் அதில் அரைத்த மாவை, நன்கு கரைத்து சேர்த்து கிளற வேண்டும் ..


களி போல நன்றாகத் திரண்டு வரும்போது அடுப்பை அணைக்க வேண்டும் ..பாத்திரத்தில் கிண்டும் போது நடுவே கட்டிகள் வராத அளவுக்கு கிண்ட வேண்டும் .

பொதுவாக பெரியவர்கள் அனைவருக்கும் தெரிந்த எளிய உணவு வகைகள்   இவை ...


எங்கள்  வீட்டில்   ராகி களி  அடிக்கடி செய்வேன் ..,.

வெந்தய களி என் சினேகிதி  ஒருவர் கூறிய முறையில் முயற்சித்தேன் ...மிக அருமையான சுவையில் கிடைத்தது. எங்கள் பாட்டி வீட்டில் சாப்பிட்ட ஞாபகம்.  இப்பொழுது இந்த களியும் எங்கள் வீட்டில் அடிக்கடி இடம்பெறுகிறது.

  அடுத்து உளுத்தங்களி இது சமையல் பிளாக் சிலவற்றில் பார்த்து செய்தது. ஆனால் அந்த உளுந்தின் சுவை மற்றும் சிறிது வழவழப்பு  இருந்ததால் பசங்களுக்கு சாப்பிட பிடிக்கவில்லை ...

ராகி களி  மற்றும் வெந்தய களியின் நடுவே வெல்லம்  வைத்து நல்லெண்ணெய்  சேர்த்து சாப்பிடும் போது மிக அருமையாக இருக்கும் ....



 அன்புடன்
அனுபிரேம்