சுவாமி நம்மாழ்வார் அவதார திருநட்சத்திரம்

இன்று   சுவாமி நம்மாழ்வார் அவதார திருநட்சத்திரம்  (வைகாசியில் – விசாகம்)........

ஆழ்வார்  வாழி திருநாமம்

மேதினியில் வைகாசி விசாகத்தோன் வாழியே

வேதத்தைச் செந்தமிழால் விரித்துரைத்தான் வாழியே

ஆதிகுருவாய்ப் புவியிலவதரித்தோன் வாழியே

அனவரதம் சேனையர்கோன் அடிதொழுவோன் வாழியே

நாதனுக்கு நாலாயிரம் உரைத்தான் வாழியே

நன்மதுரகவி வணங்கும் நாவீறன் வாழியே

மாதவன்பொற் பாதுகையாய் வளர்ந்தருள்வோன் வாழியே

மகிழ்மாறன் சடகோபன் வையகத்தில் வாழியே

நம்மாழ்வார்


பிறந்த இடம் : ஆழ்வார் திருநகரி
தந்தை : காரி
தாய் : உடையநங்கை

பிறந்த நாள் : 9ம் நூற்றாண்டின் முற்பகுதி, வைகாசி 12
நட்சத்திரம் : விசாகம் (பவுர்ணமி திதி)
கிழமை : வெள்ளி

எழுதிய நூல்கள் : பெரிய திருவந்தாதி, திருவிருத்தம், திருவாசிரியம்,திருவாய்மொழி
பாடல்கள் : 1296
சிறப்பு : திருமாலின் படைத்தலைவரான விஷ்வக்சேனரின்  அம்சம்

முந்தைய பதிவுகள் ...

ஸ்ரீ நம்மாழ்வார் வைபவம் ...

 நம்மாழ்வார் திருநட்சத்திரம்

திருவிருத்தம், திருவாசிரியம், பெரிய திருவந்தாதி, திருவாய்மொழி இவற்றை ருக், யஜூர், சாமம், அதர்வணம் எனும் நால்வேதங்களின் சாரமாக அருளிச் செய்தார்.ஆகவே சடகோபராகிய நம்மாழ்வார் வேதம் தமிழ் செய்த மாறன் என்ற புகழுக்கு உரியவரானார். 

அறிவாலும், ஞானத்தாலும், பக்தியாலும் சிறந்து விளங்கிய சடகோபரை அனைவரும் இவர் நம்மவர் என விரும்பி அழைக்க நம்மாழ்வார் என்ற பெயர் உருவானது.

 திருமால் இவருக்குத் தந்தருளிய மகிழமாலையை அணிந்திருந்த காரணத்தால், வகுளாபரணர் என்ற பெயரும் உண்டானது.

ஆழ்வார்களுள் இவரை அவயவி (உறுப்பி) எனவும், ஏனைய ஆழ்வார்களை இவருக்கு அவயங்கள் (உறுப்புக்கள்) என்றும் கூறுவார்.

அதன்படி,

பூதத்தாழ்வாரை  சிரசாகவும் ,

பொய்கை,பேயாழ்வார்களை   திருக்கண்களாகவும்,

 

பெரியாழ்வாரை   திருமுகமாகவும்,

 

திருமழிசையாழ்வாரை  திருக்கழுத்தாகவும் ,

குலசேகராழ்வாரையும்  திருப்பாணாழ்வாரையும் திருக்கைகளாகவும்,

தொண்டரடிப்பொடியாழ்வாரை  திருமார்பாகவும் ,

திருமங்கையாழ்வாரை திருநாபிக்கமலமாகவும்,

மதுரகவியாழ்வாரைத்  திருவடிகளாகவும், 

எம்பெருமானரைத்  திருவடி நிலைகள் என்னும் பாதுகையாகவும் வழங்குவது மரபு .  

திருவாய் மொழி

முதற் பத்து

இரண்டாம் திருவாய்மொழி - வீடுமின்

பக்தியுடன் எம்பெருமானடைய பிறர்க்கறிவுறுத்தல்

வீடுமின் முற்றவும் *

வீடுசெய்து *உம்முயிர்

வீடுடையானிடை *

வீடு செய்ம்மினே. (2)

1 2686

மின்னின் நிலையில *

மன்னுயிராக்கைகள் *

என்னுமிடத்து *இறை

உன்னுமின்நீரே.

2 2687

நீர்நுமதென்றிவை *

வேர்முதல்மாய்த்து *இறை

சேர்மின், உயிர்க்கு *அதன்

நேர்நிறையில்லே.

3 2688

இல்லதும் உள்ளதும் *

அல்லது அவனுரு *

எல்லையில் அந்நலம் *

புல்குபற்றற்றே.

4 2689

அற்றதுபற்றெனில் *

உற்றதுவீடுஉயிர் *

செற்றதுமன்னுறில் *

அற்றிறைபற்றே.

5 2690

பற்றிலன் ஈசனும் *

முற்றவும் நின்றனன் *

பற்றிலையாய் *அவன்

முற்றிலடங்கே.

6 2691

அடங்கெழில் சம்பத்து *

அடங்கக்கண்டு *ஈசன்

அடங்கெழில் அஃதென்று *

அடங்குக உள்ளே.

7 2692

உள்ளம் உரைசெயல் *

உள்ளஇம்மூன்றையும் *

உள்ளிக்கெடுத்து *இறை

யுள்ளிலொடுங்கே.

8 2693

ஒடுங்கஅவன்கண் *

ஒடுங்கலும் எல்லாம் *

விடும்பின்னும் ஆக்கை *

விடும்பொழுது எண்ணே.

9 2694

எண்பெருக்கு அந்நலத்து *

ஒண்பொருள்ஈறில *

வண்புகழ் நாரணன் *

திண்கழல்சேரே. (2)

10 2695

சேர்த்தடத் *தென்குரு

கூர்ச்சடகோபன்சொல் *

சீர்த்தொடையாயிரத்து *

ஓர்த்தஇப்பத்தே. (2)

11 2696

ஸ்ரீ  மணவாள மாமுனிகள் அருளிச் செய்த உபதேச ரத்தினமாலை

ஏரார் வைகாசி * விசாகத்தின் ஏற்றத்தைப்*

பாரோர் அறியப் பகருகின்றேன் ** சீராரும்

வேதம் தமிழ் செய்த * மெய்யன் எழில் குருகை *

நாதன் அவதரித்த நாள் *  (14 )

உண்டோ வைகாசி * விசாகத்துக்கு ஒப்பொரு நாள் *

உண்டோ சடகோபர்க்கு ஒப்பொருவர் ** உண்டோ

 திருவாய்மொழிக்கு ஒப்பு * தென் குருகைக்குண்டோ

ஒரு பார் தனில் ஒக்குமூர் * (15)

நம்மாழ்வார்  திருவடிகளே சரணம்!!

அன்புடன்
அனுபிரேம்...